សេចក្តីសង្ខេបសាច់រឿង Attack on Titan (Season 1)

នៅក្នុងពិភពលោកមួយដែលមនុស្សលោកត្រូវរស់នៅលាក់ខ្លួននៅពីក្រោយមហាកំពែងដ៏ខ្ពស់សន្លឹមចំនួន ៣ ជាន់ ដើម្បីការពារខ្លួនពីពួក Titan (យក្សស៊ីសាច់មនុស្ស)។ សន្តិភាពក្លែងក្លាយរយៈពេល ១០០ ឆ្នាំបានរលាយភ្លាមៗ នៅពេលដែល Colossal Titan (យក្សដ៏ធំសម្បើម) និង Armored Titan (យក្សពាសដែក ឬយក្សស្បែកតាន់) បានវាយបំបែកកំពែងជាន់ក្រៅបង្អស់ (Wall Maria)។

ហេតុការណ៍ដ៏រន្ធត់នោះបានធ្វើឱ្យ Eren Yeager ត្រូវមើលឃើញម្តាយបង្កើតរបស់ខ្លួនត្រូវពួកយក្សស៊ីទាំងរស់នៅចំពោះមុខ។ ដោយក្តីឈឺចាប់និងគំនុំឈាម Eren រួមជាមួយមិត្តភក្តិជិតស្និទ្ធពីរនាក់ទៀតគឺ Mikasa Ackerman និង Armin Arlert បានប្តេជ្ញាចិត្តចូលរួមជាមួយកងទ័ព ដើម្បីកំទេចពួក Titan ឱ្យអស់ពីភពផែនដី។

៥ ឆ្នាំក្រោយមក ពួកគេបានក្លាយជាទាហានពេញសិទ្ធិ ប៉ុន្តែពួក Titan បានវាយប្រហារកំផែងជាន់ទីពីរ (Wall Rose) ម្តងទៀត។ នៅក្នុងសមរភូមិដ៏អស់សង្ឃឹមនោះ Eren ត្រូវបានយក្សលេបចូលពោះ ខណៈពេលកំពុងជួយសង្គ្រោះ Armin។ ទោះជាយ៉ាងណា អាថ៌កំបាំងដ៏រន្ធត់មួយត្រូវបានលាតត្រដាង នៅពេលដែល Eren ស្រាប់តែអាចផ្លាស់ប្តូររូបរាងទៅជា យក្ស ដ៏មានឥទ្ធិពលមួយរូប ហើយបានជួយវាយបកទៅលើពួកយក្សវិញ និងអាចបិទរន្ធកំផែងដែលបាក់បែកបានជោគជ័យ។

បន្ទាប់ពីដឹងថា Eren មានសមត្ថភាពក្លាយជា យក្ស រូបគេត្រូវបានគេបញ្ជូនទៅកាន់ Scouting Regiment (កងទ័ពឈ្លបយកការណ៍) ក្រោមការគ្រប់គ្រងរបស់មេបញ្ជាការ Erwin និងប្រធានក្រុមដ៏ខ្លាំងពូកែ Levi ដើម្បីសិក្សាពីថាមពលនេះ និងស្វែងរកផ្លូវទៅកាន់បន្ទប់ក្រោមដីផ្ទះរបស់ Eren ដែលជាកន្លែងលាក់អាថ៌កំបាំងនៃពួក យក្ស។

នៅក្នុងបេសកកម្មក្រៅកំពែង ពួកគេបានប្រឈមមុខនឹង Female Titan (យក្សស្រី) ដែលមានប្រាជ្ញានិងក្បាច់គុនខ្ពស់ ខុសពីពួកយក្សធម្មតា។ បន្ទាប់ពីការប្រយុទ្ធគ្នាយ៉ាងស៊ីសាច់ហុតឈាម និងការបាត់បង់ជីវិតទាហានជាច្រើននាក់ ទីបំផុតពួកគេបានរកឃើញអត្តសញ្ញាណពិតរបស់ យក្សស្រី នោះគឺ Annie Leonhart ដែលជាមិត្តរួមជំនាន់របស់ Eren។ រដូវកាលទី១ បានកន្លងផុតទៅជាមួយនឹងការប្រយុទ្ធគ្នាយ៉ាងព្រៃផ្សៃចំកណ្តាលទីក្រុង រហូតដល់ Annie សម្រេចចិត្តបង្កកខ្លួនឯងក្នុងដុំគ្រីស្តាល់ដើម្បីលាក់ការសម្ងាត់ ហើយអាថ៌កំបាំងដ៏គួរឱ្យរន្ធត់មួយទៀតត្រូវបានបកស្បែក បន្ទាប់ពីគេបានឃើញមុខយក្ស ដ៏ធំមួយនៅក្នុងជញ្ជាំងកំពែងដែលបានបាក់បែក។

[Attack on Titan]