អន្ទាក់សុបិនក្នុងលំហ

រឿងរ៉ាវកើតឡើងនៅក្នុងយុគសម័យអនាគត នៅពេលដែលមនុស្សជាតិបានបង្កើតបច្ចេកវិទ្យាប្រព័ន្ធពិភពនិម្មិតក្នុងយល់សប្តិមួយឈ្មោះថា “Liang Meng” (ឬ Sweet Dreams)។ បច្ចេកវិទ្យានេះអនុញ្ញាតឱ្យមនុស្សគ្រប់រូបអាចបង្កើត និងគ្រប់គ្រងពិភពយល់សប្ដិផ្ទាល់ខ្លួនដើម្បីធ្វើអ្វីៗគ្រប់យ៉ាងតាមដែលចិត្តពួកគេប្រាថ្នា។ទន្ទឹមនឹងនោះ មានការបញ្ជូនយានអវកាសមួយឈ្មោះថា Mengya ក្នុងការធ្វើដំណើរដ៏វែងឆ្ងាយរយៈពេល ៦៥ ឆ្នាំទៅកាន់ភពដ៏ឆ្ងាយមួយ ដែលនាវិកទាំងអស់ត្រូវស្ថិតក្នុងស្ថានភាពគេងសន្លប់បណ្តោះអាសន្ន (Suspended Stasis) និងរស់នៅក្នុងពិភពយល់សប្តិដើម្បីកាត់បន្ថយការដឹងពីពេលវេលា។

ខណៈពេលដែលអ្វីៗកំពុងដំណើរការទៅដោយរលូន ស្រាប់តែប្រព័ន្ធយល់សប្តិឈ្មោះថា Meng មានបញ្ហាបច្ចេកទេសដ៏ធ្ងន់ធ្ងរ និងបានដួលរលំ (Dream Collapse)។ វិបត្តិនេះបានធ្វើឱ្យក្រុមនាវិកជាច្រើននាក់ត្រូវជាប់គាំងនៅក្នុងលំហនៃពិភពសុបិនដ៏ច្របូកច្របល់ មិនអាចដាស់ឱ្យភ្ញាក់ដឹងខ្លួនមកកាន់ពិភពពិតវិញបានឡើយ។

ដើម្បីសង្គ្រោះនាវា និងជីវិតមនុស្ស គេក៏បានដាស់មនុស្សពីរនាក់ឱ្យភ្ញាក់ឡើងពីការសន្លប់ គឺ លី ស៊ីម៉ឹង ជាប្រធានក្រុមយានអវកាស និង ស៊ូ ធៀនពៀវ ជាអ្នកគ្រប់គ្រងប្រព័ន្ធយល់សប្តិ។

អ្នកទាំងពីរត្រូវសម្រេចចិត្តលោតចូលទៅក្នុងពិភពយល់សប្តិ ដែលកំពុងច្របូកច្របល់ ដើម្បីស្វែងរក និងទាញព្រលឹងក្រុមនាវិកដែលវង្វេងត្រឡប់មកវិញ។ នៅក្នុងដំណើរការនេះ ពួកគេត្រូវឆ្លងកាត់ពិភពយល់សប្តិជាច្រើនជាន់ (Layered Realities) ដែលពោរពេញទៅដោយការស្រមៃប្លែកៗ គ្រោះថ្នាក់ និងអន្ទាក់ចិត្តសាស្ត្រ។អ្វីដែលជាឧបសគ្គធំបំផុតនោះគឺ “ការបាត់បង់ព្រំដែនរវាងការពិត និងការយល់សប្តិ“។ នៅពេលដែលពួកគេកាន់តែចូលជ្រៅទៅៗ ពួកគេចាប់ផ្តើមប្រឈមនឹងការផ្លាស់ប្តូរអត្តសញ្ញាណ ការចងចាំចាប់ផ្តើមរលុបបាត់បង់ និងមិនអាចបែងចែកដឹងថាអ្វីជាពិភពពិត អ្វីជាពិភពបំភ័ន្តឡើយ។ ពួកគេត្រូវប្រជែងនឹងពេលវេលាដើម្បីរក្សាស្មារតីខ្លួនឯង មុននឹងត្រូវជាប់គាំង និងស្លាប់នៅក្នុងយល់សប្តិនោះជារៀងរហូត។

[Per Aspera Ad Astra]